उज्यालो नेपाल पार्टी (उनेपा)का अध्यक्ष कुलमान घिसिङले साइबर सुरक्षा जोखिम देखिएको भन्दै ई–जीपी प्रणाली बन्द गरेर पुनः कागजी प्रक्रियामा फर्किने सरकारको निर्णयप्रति आपत्ति जनाएका छन्।

घिसिङले ई–जीपीमा देखिएको सुरक्षा जोखिमको तत्काल पहिचान गरी आवश्यक प्राविधिक स्तरोन्नति, सुरक्षा परीक्षण, ब्याकअप र आपत्कालीन पुनःसञ्चालन प्रणाली सुनिश्चित गरेर प्रणाली सुरक्षित रूपमा सञ्चालनमा ल्याउनुपर्ने बताएका छन्।

उनले ई–जीपी बन्द हुँदा संघ, प्रदेश र स्थानीय तहका सयौँ सार्वजनिक खरिद तथा विकास निर्माणका काम प्रभावित हुने बताएका छन्। कागजी प्रक्रियामा फर्किँदा पारदर्शिता र प्रतिस्पर्धा कमजोर हुनुका साथै मिलेमतो, अस्वस्थ प्रतिस्पर्धा, दबाब र धम्कीजस्ता पुराना विकृति पुनः मौलाउने जोखिम रहेको उनको भनाइ छ।

घिसिङले भनेका छन्, ‘डिजिटल प्रणालीमा समस्या आउन सक्छ, तर त्यसको समाधान प्रणाली बन्द गर्नु मात्र हुन सक्दैन। सार्वजनिक खरिदमा पारदर्शिता र प्रतिस्पर्धा कमजोर हुने गरी हामी फेरि कागजी र अपारदर्शी प्रक्रियातर्फ फर्किनु हुँदैन।’